Fomba fijerin’ny Antoko Maitso Hasin’i Madagasikara manoloana ny fivoahana amin’ny krizy politika eto Madagasikara

Tonga teto Madagasikara ny delegasiona mpanelanelana iraisam-pirenena, hanao tomban’ezaka ny fivoaran’ny toe-draharaha politika sy ny zava-misy eto amintsika, araka ny iraka nampanaovin’ny filoha Joachim Chissano azy ireo ho fanomanana ny tatitra hatolotra eo anivon’ny Fihaonamben’ny Vondrona Afrikanina izay hatao any Ouganda sy any Namibie.

Efa nanomboka niroso amin’ny samy Malagasy ny famahana ny krizy politika eto amin’ny firenena.
Niroso tamin’ny fametrahana ny governemanta iarahan’ny sivily sy ny miaramila mitantana ny fitondrana.

Nanambara ny filohan’ny Fahefana avon’ny tetezamita fa tsy hilatsaka amin’ny fifidianana filoham-pirenena ho avy izao.

Nanome andraikitra ny fiaraha-monim-pirenena amin’ny fikarakarana ny fikaonandoham-pirenena, miaraka amin’ny fanohanana ara-kevitra ireo ray aman-dreny mijoro.

Ny Antoko Maitso Hasin’i Madagasikara dia manohana ny fitadiavam-bahaolana eo amin’ny samy Malagasy, ary manamafy fa ilaina ny fankatoavan’ny Vondrona iraisam-pirenena izany.

Miha-sarotra ny toe-draharaha politika ankehitriny. Ny Antoko Maitso Hasin’i Madagasikara dia mandroso hevitra fa fankatoavantsika Malagasy ny vahaolana dia tsara raha ahazoana ny fankatoavan’ny fianakaviambe iraisam-pirenena, mba ho tombotsoan’ny vahoaka Malagasy izay mijaly noho ny krizy.

Ny fitadiavam-bahaolana eo amin’ny Malagasy samy Malagasy dia tokony hiainga amin’ny fitoviam-pijerin’ireo fironana samihafa eo anivon’ny fiaraha-monim-pirenena.

Ho famahan ny olana, ny Antoko Maitso Hasin’i Madagasikara dia miantso mba hivondrona ny fiaraha-monim-pirenena

Mikasika ny fikarakarana ilay fikaonandoham-pirenena, ny Antoko maitso Hasin’i Madagasikara dia manainga ny hisokafan’izany ho an’ireo Antoko politika Malagasy rehetra tsy ankanavaka.

Ny fikarakarana ny fikaonan-doham-pirenena miainga avy any ifotony no heverin’ny Antoko maitso fa tena hisian’ny fisokafana eo amin’ny dinika nasionaly.

Na izany aza, mba hisorohana ny fitadiavan-toerana sy ny fanararaotana ataon’ireo mpanao politika, ny Antoko Maitso dia manainga ny vondrona iraisam-pirenena mba hamatsy vola ireo hetsika rehetra hatao hivoahana amin’ny krizy.

Tafiditra ao anatin’izany avokoa hatramin’ny vola hikarakarana ireo fifidianana rehetra hotanterahina, mba hialana amin’ny fanodikodinana mety hitranga.

Farany, hamafisinay fa ny hany vahaolana hivoahana amin’ny krizy politika misy ankehitriny sy hisorohana ny ho avy dia ny firosoana amin’ny fifidianana mangarahara sy anjakan’ny demokrasia ao anaty filaminana.

Ho an’ny Birao Politika
SARAHA GEORGET RABEHARISOA
Filoha Nasionalin’ny Antoko Maitso Hasin'i Madagasikara

Bois de Rose
Tsy fanapotehana ny Tontolo iainana fotsiny fa ny Toe-karem-pirenena mihitsy no misy ankehitriny.
Tsy mazava mihitsy ary tsy hita ny finiavan’ny fitondrana handrara ny fanodinkodinana ny harem-pirenena ateraky ny bolabola.
Tsy misy fiovana hita amin’ny fitantanana sy fanaovana politika.
Vola mihoatra ny 300 tapitrisa dolara no nametrahana ny tetikasa fiarovana ny Tontolo iainana ary ezaka nandritra ny dimy ambiny folo taona no foana sy lasa fatiantoka avela ho an’ny taranaka.

Krizy politika
Krizy politika no niandohan’izao tetezamita izao. Mihitatra ihany ilay tetezana satria ilay krizy dia mampivandravandra ny aretin’ny mpitondra nifandimby teto amin’ny firenena. Hatramin’izao dia tsy voafaritra miaraka ny fototr’izany kanefa ny rehetra dia miroso amin’ny fanehoana ny vahaolana.
Koa, manentana ny mpanao politika rehetra ny Antoko Maitso Hasin’i Madagasikara mba hamaritra miaraka sy hiara-hanaiky ny fototry ny olana politika niteraka ny zava-misy ankehitriny. Tsy maintsy voafaritra mazava ny olana fototra izay politika fa tsy sosialy akory. Raha tsy izany mety ho vahaolana tsy mandaitra indray no ho ampiarina ka tsy hahatsabo fa hampiombo ny fery anatiny.

Ry mpiray tanindrazana,

Ny fankalazantsika miaraka izao faha-50 taonan’ny nahazoan’i Madagasikara Fahaleovantena izao, na dia mandalo toe-draharaha politika tena sarotra aza ny firenentsika dia manome Hasiny antsika Malagasy rehetra.
Maro ny mba te hanatrika sy hahatratra izao fankalazana izao saingy an’Andriamanitra moa ny fandaharana fa tsy antsika olombelona.

Ny fahatsiarovantsika ireo Malagasy zoky sy ray aman-dreny nitolona ka nahazoan’ny firenena Malagasy ny fahafahany dia hirariko mba hampitodika ny saina aman’eritreritsika rehetra amin’ny hasarobidin’izany lova napetrany izany sy ny lanjan’ny adidy tokony hiantsorohantsika taranaka.

Ny fahatsiarovana ireo mpitondra rehetra nifandimby ihany koa, na manao ahoana na manao ahoana ny fijerintsika ny zava-bitany, izay tsy nahatratra izao faha-50 taonan’ny Fahaleovantenam- pirenena izao, na tsy mankalaza izany eto an-tanindrazana, dia hirariako hanamafy ny fitadiavantsika miaraka ny vahaolana sahaza sy mendrika mba ho reharehan’ny firenentsika.

Izao no fotoana tokony hamaritantsika ny tena Fitiavan-tanindrazana.
Ny fanajana ny Aina rehetra no mariky ny Fitiavana sy ny Fifankatiavana,
Ny fampiharana mazava ny Lalàna no mariky ny Fanajana ny tombontsoam-pirenena,
Ny fifanomezan-tànana no mariky ny maha-Iray antsika rehetra,

Zontsika sy ny taranatsika ny hiadana sy ho finaritra, koa samia mitafy Hery sy Zoto ary lanjao ny Ampinga hametrahantsika miaraka firenena matotra sy lova tsara ho an’ ny taranaka ho avy.

Koa mirary soa hatrany ho antsika rehetra !

Ho ela velona anie ny Fahaleovantenan’ny firenena Malagasy !

Saraha GEORGET RABEHARISOA
Filoha Nasionaly sy ny Birao Politika
ANTOKO MAITSO HASIN’I MADAGASIKARA

Malaelo ny tsy fanatrehan’ireo mpanapaka lehibe eto madagasikara izay nasaina tany Bamako nandritra ny « 16ème reconstitution de fonds »n’ny IDA ny antoko Maitso Hasin’i Madagasikara. Izany dia niarahan’ny mpamatsy vola sy mpitarika firenena 79 ka anisan’ny firenena mahantra indrindra aran-tany ny 93 amin’izany.

Fantatra fa ny fanatrehana izany miampy ny fanehoana izay ilaina no dingana voalohany ahazoana vola. Ary satria I Madagasikara dia efa anisan’ireo firenena 39 mahantra isy be trosa indrindra eran-tany, dia tsy maninona raha tsy manatrika izany fivoriana izany. Ny tsara ho fantatra dia sady irika iray afahana miditra ho isana vondrona (ECOWAS, SADC, COMESA, COI,) no fomba afahan’ny mpamatsy vola lehibe mihaino ny fangatahana ireny fihaonana sy dinika lehibe ireny. Ankehitriny izahay dia manontany hoe nahoana I Madagasikara no tsy nanatrika izany? Mba hisian’ny fangaraharana dia mangataka fanazavana avy amin’ny fitondrana mikasika io tsy fanatrehana io ny Antoko Maitso Hasin’I Madagasikara.

Ny Antoko Maitso Hasin’I Madagasikara dia mankasitraka ny Panos Institute of South Africa izay namoaka ny valin’ny fikarohan’ny PANA (Plan d’Action nationale d’adaptation au changement climatique et de sa mise en oeuvre à Madagascar). Ny tanjon’ny PANA dia ny mba hahazoan’ny firenena vola mba afahan’ny vondrona marefo mahazo laka kokoa ka afahany miatrika ny voka-dratsin’ny fiovan’ny toerandro. Anisan’ny firenena marefo indrindra i Madagasikara raha eo amin’ny fiovan’ny toerandro. Zava-doza ho an’ireo vondrona ireo ny fiovan’ny toetrandro.

Miha-matetika sy mahery vaika hatrany loza ateraky ny hain-tany, ny tondradrano, ny rivo-doza, …satria voahilika ireo vondrona marefo ireo eo amin’ny lafiny ekonomika, sosialy, fahasalamana, … Amin’ny fambolena vary ohatra dia manimba ny famokaran’ny tantsaha sy ny fiarian’izy ireo ny tondradrano na ny hain-tany.

Mahatsikaritra ny Antoko Maitso Hasin’i Madagasikara fa tsy ampy ny fandraisan’anjaran’ireo tena mpanapaka amin’ny famolavolana sy fampiharana ny PANA. Manoloana ny fahantrana maharitra mianjady amin’ny mponina izay tambanivohitra ny ankamaroana , ny Antoko Maitso Hasin’i Madagasikara dia vonona ny hifanome tànana amin’ny fiarovana ny vondron’olona iantefan’ny PANA eo amin’ny sehatra nasionaly sy iraisampirenena mba hahazoan’izy ireo tombotsoa aterak’izany

Ny Filoha Nasionaly sy ny Birao Politika